عید مبارک بار بار
السلام علیکم
تمام قارئین کو دل کی اتھاہ گہرائیوں سے عید مبارک۔
میری ہمیشہ سے یہ خواہش تھی کہ میں اتنا فارغ ہو جاؤں کہ عید والے دن بھی اس موئے انٹرنیٹ پہ بیٹھا بلاگ لکھ رہا ہوں۔۔۔۔ پہلے میں نے یہ سوچا کہ عید والے دن ایک آدھ گھنٹا نکال کر لیپٹاپ چالو کیا جائے اور کسی بھی کونے میں بیٹھ کر کچھ لکھ دیا جائے اور ہو گیا! لیکن یہ صرف کہنا آسان تھا کیونکہ فی الحال میرا کوئی ذاتی کمرہ مختص نہیں ہے اور ہمارے گھر میں یہ اصول ہے کہ چھڑے چھانٹ لوگوں کو الگ کمرے کی کیا ضرورت۔۔۔ کسی بھی کمرے میں دو گز زمین میسر آئے تو بوریا بستر ( یا لیپ ٹاپ موبائل) اٹھاؤ اور وہاں چلے جاؤ۔ آجکل ہم ڈرائنگ روم کم سٹنگ روم میں رات کے وقت (یا کسی بھی وقت) سونے کے مجاز ہیں۔ لہٰذا عید کے روز تو اس طرح کی بیٹھک وغیرہ اس طرح بھری ہوتی ہے جس طرح عید سے ایک دن پہلے نائی کی دکان! اور حلوائی کی دکان پہ دادا جی کی فاتحہ تو ہو سکتی ہے لیکن نائی کی دکان پہ بلاگنگ۔۔۔۔ کبھی سنا نہیں۔ [مکمل تحریر پڑھیں]
پھربھی میں لکھ دیتا ہوں) 
بابائے اردو مولوی عبدالحق کا نام پہلی مرتبہ دسویں جماعت کی کتاب میں پڑھا جس میں ان کے مضامین “چند ہمعصر” میں سے ایک مضمون شامل تھا۔ اس کے علاوہ ان کے بارے میں کم ہی جاننے کا موقع ملا۔ ظاہر ہے اس کی وجہ میں خود ہی ہوں کہ انٹر کے بعد تو ویسے ہی اردو کی درسی کتب کے ساتھ ساتھ دیگر کتابوں سے بھی آہستہ آہستہ ناطہ ٹوٹتا گیا۔ کل 16 اگست کو ان کی پچاسویں برسی تھی اور کراچی سمیت ملک کے دیگر بڑے شہروں میں ان کی برسی پہ خصوصی تقاریب کا انعقاد کیا گیا۔ (کم از کم کراچی میں ہونے والی تقاریب کے بارے میں انگریزی اخبارات میں خبریں موجود تھیں، باقی “بڑے” شہروں کا ذکر میں نے حسنِ ظن کے تحت کیا ہے)۔ ٹی وی دیکھنے کا اتفاق کم ہی ہوتا ہے اس لئے میں کہہ نہیں سکتا کہ اس بارے میں میدیا میں کوئی رپورٹ یا یاد داشت نشر کی گئی یا نہیں۔ قومی زبان کے “بابا” کے حصے میں اتنا تو آنا ہی چاہئے کہ کوئی ایک آدھ ڈاکومنٹری وغیرہ ہی بنا کے چلا دیں ان کی پچاسویں برسی کے موقع پر۔ اور جیسا کہ میں نے اوپر ذکر کیا کہ انگریزی اخبارات کے مضامین میری نظر سے گزرے ہیں جب کہ اردو اخبارات کے بارے میں کچھ پتا نہیں کہ کسی نے ادھ کالمی خبر لکھی یا نہیں۔ کیونکہ اردو سرچ ایبل کم ہی استعمال کی جاتی ہے ویب سائٹس میں، کم از کم میری سرچ میں ایسا کوئی ربط نہیں آیا۔
