متفرق

پچھلے دنوں ابو شامل نے کمپیوٹر اور انٹرنیٹ پر اردو کی ترویج کیلئے ایک ایسے اردو انسٹالر کی ضرورت کا ذکر کیا تھا جو صرف چند کلکس میں کسی بھی کمپیوٹر کو اردو لکھنے اور پڑھنے کیلئے موزوں بنا دے۔ یہ ایک ایسی ضرورت ہے جس سے انکار نہیں کیا جا سکتا کیونکہ ونڈوز میں اردو فعال کرنا، پھر کی بورڈ لے آؤٹ اور پھر مناسب سے فونٹس ڈالنا۔۔۔ یہ سب کام ایسے شخص کیلئے تو کوئی مشکل نہیں ہیں جو کمپیوٹر پروگرامر ہو یا پرانا اردو بلاگر ہو یا کم از کم اردو اخبارات یا ویب سائیٹس وزٹ کرتا ہو۔ ان کے علاوہ باقی افراد کو سارا عمل بتانے سے بہتر ہوتا ہے کہ انہیں یہ سب خود کر کے دے دیا جائے۔۔۔۔!
میں اپنے ارد گرد کے لوگوں کی بات کروں تو 70 فیصد یہ نہیں جانتے کہ کمپیوٹر پر اردو لکھی جاتی ہے۔ حالانکہ سارا دن وہ انٹرنیٹ، فیس بک، موبائل وغیرہ پہ رومن اردو لکھ لکھ کر تھکتے نہیں لیکن ’اردو‘ کے بارے کچھ نہیں پتا ہوتا۔ اس کی بڑی وجوہات کے بارے میں ابو شامل اپنی پوسٹ میں تفصیل سے لکھ چکےہیں، جو کہ صد فیصد درست ہے۔ میرے کئی ایسے دوست ہیں جو کہ انگریزی زیادہ نہیں جانتے لیکن کسی نہ کسی ضرورت کے باعث یا محض تفریح کیلئے کمپیوٹر استعمال کرتے ہیں۔ اکثر مجھے ان کے پیغام موصول ہوتے ہیں کہ یار فلاں لفظ کی اردو بتا دو، فلاں کی انگریزی بتا دو۔۔۔ اگر وہ اردو لکھنے کے بارے میں جانتے ہوں تو خود ڈھونڈ سکتے ہیں اور مزید معلومات بھی پڑھ سکتے ہیں جو کہ ظاہر ہے اگر اردو میں سرچ کی جائے تو اردو کے روا بط کی صورت میں مل سکتی ہے۔ مثال کے طور پر میرے بڑے بھائی بہت عرصے سے کمپیوٹر کے صارف ہیں اور انہیں بنیادی کمپیوٹر آپریٹنگ آتی ہے لیکن انہیں یہ نہیں معلوم کہ اگر اردو میں سرچ کیا جائے تو اردو میں بھی معلومات مل جائے گی۔ میری یہ عادت ہے کہ میں اگر میں ویکیپیڈیا پہ کچھ (انگریزی میں) سرچ کروں تو اس کا اردو صفحہ ضرور دیکھتا ہوں اگر ہو تو۔۔ میرے بھائی نے ایک دو دفعہ جب یہ دیکھا کہ اردو میں بھی معلومات کا بہت سا ذخیرہ ویب پر موجود ہے تو وہ حیران ہوئے کہ انہیں اس بارے میں نہیں معلوم تھا۔ اب وہ اکثر ہی اردو ویکیپیڈیا پہ اردو صفحات دیکھ رہے ہوتے ہیں۔ اگر میں نے کچھ انگریزی میں بھی کھولا ہو تو فورآ کہتے ہیں کہ یار اردو میں دیکھ لو ناں، تا کہ ہمیں بھی کچھ سمجھ آ جائے ساتھ ساتھ۔۔۔۔ یعنی کہ بنیادی مسئلہ اردو کی انٹرنیٹ اور کمپیوٹنگ میں مناسب پروموشن ہے۔ جس کیلئے بہرحال سب کو ہی کوشش کرنی چایئے۔
اور اس اہم کام کا ایک سنگ میل ہے پاک اردو انسٹالر جو کہ چند کلکس میں آپ کے کمپیوٹر کو اردو کیلئے تیار کر سکتا ہے۔ اس کیلئے م بلال م ، جو کہ پہلے ہی اردو اور کمپیوٹر وغیرہ کے متعلق کافی نمایاں خدمات انجام سے چکے ہیں، کا بہت بہت شکریہ۔
اس پوسٹ کا مقصد صرف یہ ہے کہ زیادہ سے زیادہ افراد کی اس انسٹالر تک رسائی ممکن بنائی جا سکے تا کہ وہ آسانی سے اردو میں لکھ پڑھ سکیں۔
پاک اردو انسٹالر ڈاؤنلوڈ کریں۔

تمام قارئین، حاضرین، ناظرین، متاثرین ۔۔۔۔ سب کو میرا عاجزانہ سلام!
مجھے پوری نہیں تو آدھی امید تو ہے کہ آپ مجھے بھول گئے ہوں گے جیسے کہ میں۔۔۔۔ اپنے بلاگ کا یوزرنیم ہی بھول گیا تھا۔۔۔۔! جو نہیں بھولے ان کا شکریہ۔۔۔ جو بھول گئے ان کو ملامت!!
اس طویل غیر حاضری کی وجہ انجینئرنگ کی آخری ششماہی تھی۔ پڑھنا پڑھانا تو خیر کیا ہوتا ہے، بس ذرا ششکے کے طور پہ بلاگ کو ’سیڈے‘ لگا دیا تھا۔ اب تو فارغ التحصیل ہوئے اور خیر سے بر سر بے روزگار ہوئے بھی ایک ماہ ہونے کو ہے۔ اس عرصے کے دوران دوسری تمام بلاگی سرگرمیوں سے بھی کنارہ کئے رکھا۔ ہاں، فیس بک پہ جلوہ افروزیاں جوں کی توں برقرار تھیں اور ہیں۔ :پ
آج ایک دوست کی نئی نئی ویب سائٹ دیکھی تو دل میں خیال آیا کہ ہمارا بھی ایک بلاگ ہے۔۔۔۔ شیخیاں بگھارنے کو پتا درج کیا تو لاگ ان کا صفحہ آیا۔ پچھلے ڈیڑھ سال سے لیپٹاپ پہ ونڈوز ری نِیو کرنے کی نوبت نہیں آئی تھی۔۔ ڈگری مکمل ہوتے ہی لیپٹاپ کو غسلِ فراغت دیا تھا، لہٰذا تمام محفوظ شدہ پاسورڈ شاسورڈ مٹا دیئے تھے۔ اب اپنے سارے نام لکھ لکھ کے دیکھ لئے اور پاسورڈ میں بھی ’ سب‘ کوڈ ورڈز لگا لئے۔۔ لیکن کوئی شنوائی نہیں۔۔۔ فیس بک پہ محترم مولانا ڈفر صاحب ڈی والے نے بتایا کہ یوزرنیم تو ایڈمن ہوتا ہے نا۔۔۔۔
بس پھر سب کچھ ایک دم سے ذہن میں آ گیا۔ اس کارِ خیر کیلئے میں ڈفر اور محترم منیر عباسی صاحب کا بھی مشکور ہوں، جنہوں نے مدد کی، اور یاسر جاپانی کا بھی۔۔ انہوں نے’ ٹرائی ٹرائی اگین‘ کا نادر مشورہ مفت دیا۔
اس پوسٹ کو یہیں پہ ختم کرتے ہیں اور آئیندہ آنے کی امید کے ساتھ ولسلام!