عید مبارک بار بار

السلام علیکم
تمام قارئین کو دل کی اتھاہ گہرائیوں سے عید مبارک۔
میری ہمیشہ سے یہ خواہش تھی کہ میں اتنا فارغ ہو جاؤں کہ عید والے دن بھی اس موئے انٹرنیٹ پہ بیٹھا بلاگ لکھ رہا ہوں۔۔۔۔ پہلے میں نے یہ سوچا کہ عید والے دن ایک آدھ گھنٹا نکال کر لیپٹاپ چالو کیا جائے اور کسی بھی کونے میں بیٹھ کر کچھ لکھ دیا جائے اور ہو گیا! لیکن یہ صرف کہنا آسان تھا کیونکہ فی الحال میرا کوئی ذاتی کمرہ مختص نہیں ہے اور ہمارے گھر میں یہ اصول ہے کہ چھڑے چھانٹ لوگوں کو الگ کمرے کی کیا ضرورت۔۔۔ کسی بھی کمرے میں دو گز زمین میسر آئے تو بوریا بستر ( یا لیپ ٹاپ موبائل) اٹھاؤ اور وہاں چلے جاؤ۔ آجکل ہم ڈرائنگ روم کم سٹنگ روم میں رات کے وقت (یا کسی بھی وقت) سونے کے مجاز ہیں۔ لہٰذا عید کے روز تو اس طرح کی بیٹھک وغیرہ اس طرح بھری ہوتی ہے جس طرح عید سے ایک دن پہلے نائی کی دکان! اور حلوائی کی دکان پہ دادا جی کی فاتحہ تو ہو سکتی ہے لیکن نائی کی دکان پہ بلاگنگ۔۔۔۔ کبھی سنا نہیں۔
بس اسی وجہ سے میں نے ایک سادہ اور آسان سا کام کیا اور وہ یہ کہ پوسٹ (اسم) لکھی ایک دن پہلے جائے اور پوسٹ (فعل) اگلے دن کیا جائے تاکہ کھیر کھانے کیلئے آنے والوں کا تانتا بغیر کسی خلل کے بندھا رہے۔ یہ کام کرنا نہایت آسان ہے، کم از کم ورڈ پریس والوں کو معلوم ہی ہو گا کہ وہ اپنی تحریر کو موخر کرکے بعد میں شایع کرنے کیلئے شیڈیولنگ کا استعمال کر سکتے ہیں۔ اس بات سے مجھے بر سبیل التذکرہ یاد آ گیا کہ کیا ایسا ہو سکتا ہے کہ عید کا چاند ایک دن پہلے ہی کسی ’سیانے‘ بندے کو دکھوا دیا جائے اور اعلان اگلے دن ’شیڈؤل‘ کر دیا جائے۔ یا ،جن حضرات کو ایک دن پہلے چاند نظر آ گیا تھا، انہی سے کہا جائے کہ اگلے دن بھی اسی مبارک جگہ جا کے چاند دیکھ لیں اور اس کا ثواب اور شہادت ہماری کمیٹی کی مِلک کر دیں۔
اصل مقصد صرف تمام لوگوں کو عید کی خوشیوں میں شریک کرنا تھا اور ایک بلاگر کیلئے اس کے علاوہ اور کیا طریقہ ہو گا۔
تمام پڑھنے والوں اور ان کے اہلِ خانہ کو عید الفطر بہت بہت مبارک ہو۔ اللہ تعالیٰ سے دعا ہے کہ وہ ہم سب کیلئے اس عید کو اور آنے والے تمام دنوں کو خوشیوں، امن اور سلامتی کا مخزن بنا دے۔ آمین

بقول شاعر:

ایک ،دو، تین، چار
عید مبارک بار بار

• Tweet
• Pin It