معذور

جمعہ کا دن تھا۔ صبح گیارہ بارہ بج رہے تھے۔ جامع مسجد کا دروازہ ابھی بند ہی تھا کہ ایک آدمی، ایک عورت اور ایک نوجوان لڑکی تیز تیز چلتے ہوئے دروازے کے قریب آئے۔ تینوں نے موٹی کمبل نما چادریں اوڑھ رکھی تھیں اور آدمی نے ایک گٹھری بھی کندھے پہ اٹھائی ہوئی تھی۔ دروازے کے ساتھ ہی ایک تنگ سی گلی تھی جو آگے سے بند تھی۔ تینوں اس گلی میں گئے اور آدمی نے گٹھری اتار کر اسے کھولا اور اندر سے کئی چھوٹے بڑے کپڑوں کے ٹکڑے نکالے۔  لڑکی اور عورت زمین پہ بیٹھ چکے تھے۔ لڑکی نے اپنا کمبل اتارا اور اس عورت نے کپڑے کا ایک بڑا سا ٹکڑا اٹھا کر اسے اس انداز سے لڑکی کی ٹانگوں پہ باندھنا شروع کیا کہ جیسے لڑکی دوزانو بیٹھی ہو۔ اس کی ٹانگ مکمل طور پر دوہری ہو گئی تھی اور وہ عورت اس پہ ایک اور کپڑا لپیٹ رہی تھی۔ تقریبآ 5 منٹ بعد وہ لڑکی کھڑی ہوئی تو کوئی نہ کہہ سکتا تھا کہ اس کی ایک ٹانگ ہے یا دو!
اب وہ مسجد کے باہر کھڑی ہو کر مانگنے کیلئے تیار تھی۔
————————————————————————————————
میرے والد صیب بیمار ہیں اور علاج کیلئے پیسوں کی ضرورت ہے۔ ڈاکٹر کی پرچی میرے پاس موجود ہے، آپ دیکھ سکتے ہیں۔ برائے مہربانی میری کچھ مدد کردیں۔ اللہ کسی کو کسی کا محتاج نہ کرے میرے بھائیو!۔
بظاہر کسی قسم کی کوئی معذوری نظر نہیں آ رہی تھی لیکن نوجوان انتہائی بے شرمی سے دروازے میں کھڑا ہو کر صدا لگا رہا تھا۔ میں نے دوسری طرف منہ پھیر لیا اور کھڑکی سے باہر دیکھنے لگا۔
کھڑکی سی باہر بھی ایک بھکاری موجود تھا۔ ایک ہاتھ لٹکا کر، لنگڑا لنگڑا کر چلتے ہوئی ہر کھڑکی پہ صدا لگا رہا تھا بلکہ کچھ عجیب سی دھونس جما رہا تھا۔۔ آواز ہیڈ فونز کے باوجود بھی میرے کانوں میں گھسی جا رہی تھی۔ اگلی سیٹ پہ سیاہ چشمہ لگائے بیٹھا وہ شخص بڑے پر سکون انداز میں بیٹھا رہا کہ جیسے اسے اس بھکاری کی آواز آ ہی نہ رہی ہو۔ بھکاری نے اس شخص کی ’بے نیازی‘ دیکھتے ہوئے کچھ لعن طعن بھی کی کہ اللہ کے دیئے میں غریبوں کا حق بھی ہے۔ پانچ، دس دینے سے تیرے کول (پاس) کم نی ہو جانے! وہ صاحب ٹس سے مس نہ ہوئے۔ حالانکہ دیئے تو میں نے بھی نہیں تھے لیکن ٹس سے مس ضرور ہوا تھا، بلکہ بہت زیادہ ہو رہا تھا۔۔۔
بس کے باہر کھڑا ایک آدمی جلدی سے اندر آیا اور بولا: ارے تم لوگ کچھ شرم کرو، ان بھائی صاحب کو تو چھوڑ دو۔ ذرا دیکھو ان کو اور ڈوب مرو۔ یہ پیدائشی اندھے اور بہرے ہیں، ایک فیکٹری میں پیکجنگ کا کام کرتے ہیں۔ کچھ ماہ پہلے ایک حادثے میں ان کی ٹانگ بھی ضائع ہوگئی تھی لیکن اب بھی کام نہیں چھوڑا۔ اور ایک تم لوگ ہو۔۔۔۔