نوسٹیلجیا – Nostalgia

انسان کی زندگی میں خواہشات کا بڑا عمل دخل ہوتا ہے۔ اس کی سوچ کی پرواز کبھی اس کی ‘اوقات’ کی پابند نہیں ہوتی اور ہمیشہ حدود و قیود سے آزاد ہو کر بلند ہوتی ہے۔ معاشرے کی بقا اور ترقی اسی پرواز کی محتاج ہے۔ لیکن اس پرواز کے ساتھ ایک اور احساس بھی بیدار ہوتا ہے جسے انگریزی میں نوسٹیلجیا (Nostalgia) اور اردو میں پتا نہیں کیا کہتے ہیں (ماضی پرستی؟) ۔ انسانی فطرت کسی حال میں بھی خوش نہیں رہنے دیتی اور ماضی کی یاد اس کو دیوانہ کیے رکھتی ہے۔
خیر وقت وقت کی بات ہے، اسی بات پہ ابنِ انشاء کی ایک خوبصورت نظم جو ہمیشہ سے میری پسندیدہ رہی ہے۔

ایک چھوٹا سا لڑکا تھا میں جن دنوں

ایک میلے مین پہنچا ہُمکتا ہوا

جی مچلتا تھا ہر اک شے پہ مگر

جیب خالی تھی کچھ مول لے نہ سکا

لوٹ آیا لئے حسرتیں سینکڑوں

ایک چھوٹا سا لڑکا تھا  میں جن دنوں

خیر، محرومیوں کے وہ دن تو گئے

آج میلہ لگا ہے اسی شان سے

جو چاہوں تو اک اک دکاں مول لوں

جو چوہوں تو سارا جہاں مول لوں

نارسائی کا جی میں اب دھڑکا کہاں

پر وہ چھوٹا سا، الہڑ سا لڑکا کہاں!۔