فیسبک نامہ

میرے فیسبک پہ کوئی ساڑھے کو تین سو ”دوست“ ہیں۔ صبح سے شام تک میری ’وال‘ پہ ہزاروں کی تعداد میں مواد چپکایا جاتا ہے۔ ظاہر ہے یہ سب کچھ دانستہ نہیں چپکایا جاتا بلکہ ایک خود کار ڈھنڈورا سسٹم کے تحت دنیا میں موجود لاکھوں افراد کی پوسٹیں کروڑوں افراد تک پہنچا دی جاتی ہیں۔ گندے لطیفوں سے لے کر خلیل جبران کے فلسفے تک سب کچھ ایک ایک کر کے سامنے آتا رہتا ہے۔ پاس کر یا برداشت کر کے عمل کے تحت اس کو پراسیس کرنا ہوتا ہے اور لگاتار کرتے رہنا ہوتا ہے۔ جتنی کمپلیکس یہ دنیا ہے اس سے کئی گنا زیادہ مشکل اور عجیب اس دنیا کی ”سوشل لائف“ ہے۔ یہ جو لائک اور شیئر ہے ناں، اس نے ہمارے لئے معلومات کا مقصد اور ان کی اصل بدل کے رکھ دی ہے۔ کبھی کبھی میں حیران رہ جاتا ہوں جب میں اپنی وال دیکھتا ہوں کہ یہ ہو کیا رہا ہے یہاں؟ پاکستان میں گفتگو ہی ایسے شروع ہوتی ہے کہ: ”تجھے پتا چلا کامونکی میں تین سروں والا کالا ناگ پکڑا لوگوں نے۔۔۔فیس بک پہ ویڈیو دیکھی تھی میں نے۔“ کوئی کہتا ہے ” یار یہ فلاں کمپنی کا جوس نہ پیا کرو، اس میں ڈائی فلورو ٹرائی کاربو آکسی نائٹرو پرو پیو نک ایسڈ ہوتا ہے!!۔۔۔ میں نے کل ہی فیس بک پہ پڑھا تھا۔“ کوئی صاحب اسلامی معلومات کا خزانہ اس تندہی سے شیئر کرنے پہ لگے ہوئے ہیں کہ شاید خود پڑھنے کا بھی موقع نہیں ملتا۔ ایسے ایسے اقوالِ زریں ڈھونڈ کے لگاتے ہیں کہ بندہ کراس چیک ہی نہ کر سکے۔ کسی صاحب نے یہ بیڑا اٹھایا ہوا کہ دنیا بھر سے کٹی پھٹی، مسخ شدہ لاشوں کی تصاویر کے نیچے اپنی مرضی کی عبارت، مرضی کے بندے سے منسوب کرکے دھڑادھڑ لگائی جا رہے ہیں۔ بعض اوقات وہی پرانی لاش، نئے جھنڈے کے ساتھ شیئر کی ہوئی ملتی ہے۔
شعراء کے کلام کی بکھری ہوئی دھجیوں کا ذکر پہلے ہی کر چکا ہوں میں جس میں سر فہرست ہمارے علامہ اقبال ہی ہیں۔ بہت سے ایسے فیس بک صفحات جنہوں نے نام ہی اقبال، علامہ اقبال، کلام اقبال وغیرہ رکھا ہوا ہے، وہ بھی اس غیر ذمہ داری سے شیئر کرتے ہیں کہ اب تو غصہ بھی نہیں آتا! ایک دو صفحات پہ میں نے یہ مہم بھی چلائی کہ ہر پوسٹ کے نیچے کمنٹ میں اس کا حوالہ مانگنا شروع کر دیا تا کہ اگر کسی کو پتا ہو تو لگا دے، اور اگر کسی کو نہیں پتا تو اس کو مشکوک حیثیت حاصل ہو جائے۔ چلیں یہ تو ہوئیں پرانی اور ہمیشہ سے ہوتی ہوئی حرکتیں۔۔۔ ذرا حال میں آتے ہیں۔ جب سے رمضان شروع ہوا ہے، ایک عجیب قسم کی روانی آگئی ہے۔ میں سمجھ سکتا ہوں کہ اتنا لمبا روزہ گزارنا مشکل کام ہے اور لوگ ذرا فریش ہونے کو سارا دن فیسبک پہ گزارتے ہیں تاکہ روزے کی سختی میں کمی آ جائے۔ سحری کے بعد نیند آنے میں ذرا دیر ہو جاتی ہے اسلئے بستر میں پڑے پڑے فیسبکنا ہی واحد ذریعہ نجات نظر آتا ہے۔ اوپر سے فیفا ورلڈ کپ نے کسر پوری کر دی تھی۔ ابھی ورلڈ کپ کے آخری میچ باقی تھے کہ اسرائیل و فلسطین کا تنازعہ زور پکڑ گیا۔ ساتھ میں رمضان نشریات میں ”عامر بھائی“ بھی فارم میں آنے لگے۔ اب اتنا سب کچھ ہو رہا ہو اور 3جی اور فیسبک بھی آپکی رسائی میں ہو تو۔۔۔۔ رسمِ دنیا بھی ہے، موقع بھی ہے، دستور بھی ہے۔۔۔
فٹبال فینز نے تو ایک بار انتہا ہی کر دی، میسی کے نقادوں نے غزہ پہ بمباری کے بعد میسی کی اسرائیل میں لی گئی تصاویر لگانی شروع کر دیں۔ ذرا نیچے کیا تو اس کے مداحوں نے اپنی صفائی میں لنک شیئر کرنا شروع کئے ہوئے تھے کہ وہ فلسطین سے بھی اظہارِ یکجہتی کر چکا ہے! خدا کے بندو! ذرا سوچو کہ کیا اس سے کوئی فرق پڑتا ہے کہ ایک ارجنٹینی فٹبالر اسرائیل میں کیا کرتا پھرتا ہے۔ یا وہ فلسطین کے بارے میں کیا سوچتا ہے؟ اس سے نہ تو میچ پہ کوئی اثر پڑتا ہے نہ ہی فلسطین پہ۔۔۔ فرق پڑتا ہے تو بس اتنا کہ یہ پتا چلتا ہے کہ ہم کتنے سپر فیشل ہیں اپنے جذبات میں، اپنی حمایت میں اور اپنی مخالفت میں۔ کھیل کو کھیل اور سنجیدہ موضوع کو سنجیدہ رکھنا ہم کبھی بھی نہیں سیکھتے۔ حقائق کو حقائق مان کر تسلیم کرنا اور جھوٹ کو جھوٹ کہنا خواہ وہ کتنا ہی ایمان افروز، خوبصورت اور ’ضروری‘ نظر آئے، یہی اصل مردانگی ہے۔

• Tweet
• Pin It