سالگرہ کا دن آیا ہے

آج مجھے بلاگنگ کرتے ہوئے 3 سال ہو گئے ہیں۔ 13 جنوری 2009 کو میں نے اس میدان میں اپنا پہلا قدم رکھا تھا۔ اگرچہ اس دشت کی سیاحی میں بس دو چار گام کا فاصلہ ہی طے کر پایا ہوں لیکن بہت کچھ سیکھنے کو ملا۔ بہت سے لوگوں کر پڑھنے کا موقع ملا۔ اپنی بات کہنے کا سلیقہ آیا اور خاص طور پر اردو میں ٹائپنگ سپیڈ اچھی ہو گئی ہے۔ 🙂
بلاگنگ لفظ سے واقفیت شاید کسی انگریزی میگزین کو پڑھتے ہوئے ہوئی، سرچ کیا تو پتا چلا کہ یہ ہوتی ہے بلاگنگ۔ اردو بلاگنگ کے بارے میں اردو محفل سے پتا چلا۔ اردو محفل میں بہت عرصہ لوگوں کو دیکھنے اور پڑھنے کے بعد اپنے پہلے سے موجود بلاگسپاٹ کے اکاؤنٹ کو کئی بار تازہ کیا لیکن کچھ لکھ نہ سکا۔ پھر وہیں سے ہی اردو ٹیک ڈاٹ نیٹ کا پتا چلا۔ اس پہ اکاؤنٹ بنایا اور پہلا بلاگ اسی پہ لکھا۔ لیکن پھر جلد ہی بلاگسپاٹ ڈاٹ کام پہ پانچواں درویش کے نام سے اردو بلاگ سیٹ اپ کر لیا اور اس پہ منتقل ہو گیا۔ بلاگسپاٹ سے فری ڈومین اور پھر ذاتی ڈومین پہ منتقلی تو یہاں اور یہاں پڑھی ہی جا سکتی ہے۔ 🙂
ان تمام مراحل میں اردو محفل کے نبیل بھائی اور دیگر سے بہت مدد لی، اس کے علاوہ م بلال م اور جہانزیب اشرف کے ساتھ ساتھ تمام اردو بلاگران نے ہر مشکل وقت میں بہت ساتھ دیا۔ اب تو گھر کی بات ہے سو شکریہ کیا ادا کرنا بار بار! ط:
ہاں، قارئین کا شکریہ میں ضرور ادا کرنا چاہوں گا جنہوں نے میری تقریبا 82 پوسٹوں کو نہ صرف پڑھا اور برداشت کیا بلکہ 564 کے قریب تبصرے بھی کیے۔ خاموش قارئین سے گزارش ہے کہ اپنے ہونے کا احساس دلایا کریں اور خاموشی کا بائیکاٹ کریں۔ 🙂
اب آئے ہیں تو کیک تو کھا کر ہی جایئے گا۔ یہ لیجئے۔