بڑے ہو کر کیا بنیں گے؟

ارے، آپ کو تو این سی اے (NCA) میں جانا چاہیئے تھا!
یہ وہ جملہ ہے جو کالج میں اور کالج کے بعد یونیورسٹی میں ہمیشہ مجھے سننے کو ملا۔ وجہ؟ وجہ آپ کو میرے بلاگ کو دیکھ کر بھی اندازہ ہو رہا ہو گا۔ اس کے بیک گراؤنڈ امیج میں موجود تمام اسکیچ میں نے بقلم خود بنائے ہیں۔ فی الحال جو ہیڈر لگا ہوا ہے، وہ بھی پنسل اور کاغذ پہ ہی بنا تھا۔ اور ۔۔۔۔ میں ایک کمپیوٹر انجینئر ہوں!
جس مضمون میں مجھے لطف آتا ہے وہ پروگرامنگ ہے، کیونکہ کہنے والے کہتے ہیں ”کوڈ از پوئٹری“ (code is poetry) یعنی اس میں بھی جمالیات انوالو ہو ہی جاتی ہے۔
ایسا نہیں ہے کہ میرے گھر والوں نے مجھ پہ کسی قسم کی زبردستی کی تھی کہ مجھے کمپیوٹر انجینئر ہی بننا ہے بلکہ وہ تو اب بھی پوچھتے ہیں کہ ” یار، یہ کمپیوٹر انجینئر کرتا کیا ہے؟” یعنی نو آئیڈیا!
بس اسی نو آئیڈیے کی وجہ سے میں کمپیوٹر انجینئر ہوں۔ میٹرک میں بیالوجی پڑھی یعنی ڈاکٹر بننا تھا۔۔۔۔ انٹر میں ریاضی رکھ لی کیونکہ اس میں زیادہ نمبر آ گئے تھے۔۔۔۔ اور یونیورسٹی میں کمپیوٹر کیونکہ انٹری ٹیسٹ اچھا نہیں ہوا تھا! یہ ہے ہماری کیریئر پلاننگ۔
چلیں، مجھ سے تو پھر بچپن میں کوئی پوچھتا تھا کہ بڑے ہو کر کیا بننا ہے تو میں جھٹ کہہ دیا کرتا تھا کہ ”ڈاکٹر“ ۔۔۔ میرے ایک دوست کو یہ گلہ ہے کہ اس سے بچپن میں کبھی کسی نے پوچھا ہی نہیں کہ بیٹا بڑے ہو کر کیا بنو گے؟ سب یہی کہتے تھے کہ ”اے کُجھ کرے گا!“ لیکن ہوا اس کے برعکس یعنی ”کُجھ“ وی نئیں کر سکا ۔( فی الحال) ۔۔ 🙁
والدین سے کیا گلہ کریں، اگر وہ خود تعلیم یافتہ ہوتے یا کسی ایسے شعبے سے منسلک ہوتے تو ضرور راہنمائی کرتے۔ جو انہیں پتا تھا وہ انہوں نے بتایا اور اس کے علاوہ سب سے اہم کام یعنی سرمایہ مہیا کیا۔ سکول میں نمبر لینے سے فرصت ملتی تو اور کسی طرف دھیان جاتا۔ جو چار مضمون ہوتے ہیں ان میں سے 3 لازمی اور ایک میں کیا چوائس ہونی ہے۔۔۔۔ 500 بچے بیالوجی پڑھ کے میٹرک کرنے کی کوشش کرتے ہیں، 400 رہ جاتے ہیں اور 100 میں سے 50 کسی نہ کسی طرح انٹر میں بھی بیالوجی رکھ لیتے ہیں۔ باقی کے پچاس میں سے پچیس اضافی میتھس کا پرچہ دے کر پری انجینئرنگ میں شامل ہو جاتے ہیں۔ اور رہ گئے آخری پچیس، وہ ’کجھ‘ بھی نہیں کر پاتے۔ 🙁
یہ تو بات تھی سکول کی۔ کالج میں اس سے بھی زیادہ ’ب پلاننگ‘ منتظر ہے، جس طرف کی ہوا چلی، سب اسی طرف لڑھک گئے۔ 3 ایک کالج میں جا رہے تھے، ساتھ میں مزید 4 کو بھی گھسیٹ لیا۔ والدین بیچارے بھی کیا کریں، ان کے ساتھ ساتھ ان کے بچوں کو بھی نہیں معلوم کے کیا پڑھنا چاہیئے اور کیوں پڑھنا چاہیئے۔
کیریئر پلاننگ کے بارے میں لکھے گئے اس مضمون کے مطابق 50 فیصد بچے کا رجحان، 40 فیصد ملکی حالات و ضروریات اور 10 فیصد والدین کی خواہش کیریئر کے فیصلوں میں شامل ہونی چاہئیں۔ یہاں اس قسم کی تمام تحقیقیں دھری کی دھری ہی چھوڑ دی جاتی ہیں۔
اس مضمون کا بنیادہ مقصد جلی کٹی سنانا نہیں بلکہ یہ احساس ہے کہ زندگی کے نہایت اہم فیصلے کو جتنی اہمیت دی جاتی ہے وہ کم نہیں بلکہ ہے ہی نہیں۔
” جو مرضی پڑھ لو!“
اس میں نمبر نہیں آتے، سوچ لو!
سائینس ہی رکھنی چاہیئے۔ آرٹس تو نالائق پڑھتے ہیں۔
اس کا سکوپ ہے، اُس کا کوئی سکوپ نہیں۔

اس طرح کے جملوں سے کیا حوصلہ ملنا ہے بچوں کو۔ ان کو تھوڑا وقت دیں۔ ان کے سامنے آپشن رکھیں، تمام ضروری باتیں پوچھ کر بتائیں۔ مشورہ کریں۔
اس سلسلے میں تین لوگ ہیں جو اہم کردار ادا کر سکتے ہیں:
1۔ والدین
2۔ اساتذہ / ادارے
3۔ آپ!
باقی دو کا آپ کو پتا ہے، لیکن آپ کیا کر سکتے ہیں ان بچوں اور بڑوں کی مدد کیلئے جو ان مسائل کا شکار ہوتے ہیں۔ آپ کسی بھی فیلڈ یا شعبے میں ہیں تو اس کے بارے میں اور اس سے ملتے جلتے شعبوں کے بارے میں اپنے قریبی دوستوں اور عزیزوں سے پوچھ کر معلومات دے سکتے ہیں بچوں کو۔ ان کی کیرئر کونسلنگ کر سکتے ہیں۔ اپنے دوستوں کے ساتھ مل کر اپنے محلے میں یا اگر ممکن ہو تو کسی سکول میں جا کر بچوں کے ساتھ ایک سیشن رکھ سکتے ہیں ان معاملات کی طرف توجہ دلانے کیلئے، ان کے اساتذہ کے ساتھ مل کر اس بارے میں بات کر سکتے ہیں۔
آخر میں میں اس کُجھ نہ بن سکنے والے دوست کا شکریہ ادا کروں گا کہ یہ تحریر میں نے اس کے کہنے پہ ہی لکھی ہے ۔ اس کاخواب ہے کہ وہ دوسروں کو کچھ بنتا ہوا دیکھے۔ اور میرا یقین ہے کہ آج نہیں تو کل وہ کجھ نہ کجھ ضرور کر لےگا اور ضرور کامیاب ہوگا۔ 🙂